എയിഡ്സ് രോഗി ( കവിത )

മാദക കാമ ദേഹങ്ങളെ ഭോഗിച്ചും
സദാചാര നീതി ശാസ്ത്രങ്ങളെ
രതി സുഖ തൃഷ്ണയില്‍ ദഹിപ്പിച്ചും

അനാഥത്വത്തിന്‍െറ
വീങ്ങിയ ശ്വാസ കോശങ്ങളെ
അവജ്ഞയുടെ
വിധി വൈറസുകള്‍ കാര്‍ന്നു തിന്നും

വേറിട്ട്‌ നില്‍ക്കുന്ന
സഹതാപ നോവുകളെ
വെറുപ്പിന്റെ
കണക്കു പുസ്തകത്തില്‍ വരവ് ചേര്‍ത്തും

അവശേഷിപ്പൂ
നീയീ ദുരന്തതിന്‍ ബാക്കി പത്രമായ്‌
ആശയുടെ
കുളിര്‍ മഴ പെയ്യിക്കാത്ത പാഴ് മേഘമായ്‌.

വിശപ്പിന്റെ വിളി !! ( കവിത )

ഉമി നീരിലലിയുന്ന
അന്നജ മോഹങ്ങളെ
തൊലി പൊളിച്ചു
വരഞ്ഞു കീറി
മസാല തേച്ചു
നിരാശയുടെ ചൂടെണ്ണയില്‍
വറുത്തു കോരി
ദയയുടെ വിളുംബുടഞ്ഞ
മണ്‍പാത്രങ്ങളില്‍
വിളമ്പുമ്പോള്‍
ആ വിളി കേട്ടിരുന്നുവോ ?
വിശപ്പിന്റെ വിറയാര്‍ന്ന വിളി !!