സീന്‍ ഒന്ന് :
എടാ കൊച്ചു ...
എന്തരണ്ണ ?
നീ പിടിച്ചിരുന്നോ.വെള്ളത്തില്‍ വീണു പോയാല്‍ എനിക്ക് മുങ്ങി തപ്പാന്‍ പറ്റൂല.
ഓ .. അണ്ണന്‍ കത്തിച്ചു വിട്.നേരത്തെ എത്തിയില്ലങ്കില്‍ ബിവറേജ് അടച്ചു പൂട്ടും.രാവിലെ അടിച്ച ഗോല്‍ക്കണ്ട ഇപ്പോഴും വയറ്റില്‍ കെടന്നു കത്താണ്.
അണ്ണാ ..
എടേ എന്തരു ?
അണ്ണാ രാവിലത്തെ മൊതല് കത്തിയാ ?
ഓ .. കൊറച്ചു കത്തിയടെ !! നിനക്കാ ?
എന്തരു പറയാന്‍ അണ്ണാ .. എനിക്ക് ചെവിയില്‍ ഒരു ചെറിയ പെരുപ്പ്‌ മാത്രമേ ഒണ്ടായിരുന്നുള്ളു!!
എടേ ലവന്മാര്‍ ഇപ്പൊ കുപ്പീല് നെറയെ വെള്ളം ഒഴിച്ചാണ് വിക്കണത്‌ കേട്ട...
ഓ തന്നെ !! ഒരു കൃതവും ഇല്ലണ്ണ !! അടിച്ചത് മുഴുവനും പെടുത്തു പോയി !! ഇടയ്ക്കിടയ്ക്ക് മൊബെല് കാരു റീ ചാര്‍ജ് ചെയ്യണ പോലെ ചാര്‍ജ് ചെയ്താ വല്ലതും ആയി !! വല്ല വിധേനെയും വല്ലവനെയും കുറ്റി വച്ച് ഒരു പെയിന്റ് ആന്തി കൊണ്ട് വന്നു ചാര്‍ജ് ചെയ്താ ദാ കെടക്കണ്.. "പരിധിക്കു പുറത്തു"
അണ്ണാ ഇങ്ങനെ പോയാ എങ്ങനെ അണ്ണാ നമ്മള്‍ കുടിയന്മാര്‍ ജീവിക്കണേ ? എത്ര ലവന്മാരെ തള്ളക്കു വിളി കേട്ടാണ് അണ്ണാ നമ്മള്‍ കൊറച്ചു സൊയമ്പന്‍ നാക്കില്‍ തൊട്ടു തേക്കണതു !!
അണ്ണാ ...
എന്തരു കൊച്ചു ?
അണ്ണാ ഈ തമിഴന്മാരെ കൊണ്ട് തോറ്റു.
ലവന്മാര്‍ ഡാം കെട്ടാനും വിടൂല .. ജല നിരപ്പ് കൊറക്കാനും വിടൂല .. പശുവോട്ട് തിന്നേം ഇല്ല പട്ടിയെ കൊണ്ട് തീറ്റിക്കേം ഇല്ല എന്ന ഗതിയാണ് ഇപ്പൊ !!
അവിടന്ന് പൊങ്ങിയ താനേ കാറ്റ് വന്നു ഇവിടേം വന്നു കലിപ്പാക്കി !! റോഡേതു പുഴയെത് എന്ന അവസ്ഥയല്ലേ അണ്ണാ ഇപ്പൊ. ഇന്ന് ന്യൂയീര്‍ മുഴുവനും വെള്ളത്തില്‍ ആയല്ലോ അണ്ണാ .. ദാണ്ടേ ബൈക്കും കാറുമൊക്കെ മുങ്ങി നടക്കണ് !! തള്ളെ കലിപ്പ് .. കലിപ്പ് ..
എന്റെ ആറ്റുകാല്‍ അമ്മച്ചീ തിരോന്തരത്തെ എല്ലാ ബിവറേജുകളിലും വെള്ളം കേറി ഫുള്ളും പൈന്റും ഒഴുകി നടന്നെങ്കില്‍ !! ഞാന്‍ ചൂണ്ടയിട്ടു പിടിച്ചേനെ !!
അണ്ണാ..
എന്തരു ടെ ?
നിങ്ങള് ബൈക്ക് ഉരുട്ടണ അതാ ഓടിക്കണ ?
ഡേയ് കൊച്ചു പിടിച്ചിരുന്നോ ...
മരുതം കുഴി ഇറക്കം ആണ്..
സൂക്ഷിച്ചു ഇരുന്നില്ലെങ്കില്‍ മരുതം കുഴി ആറ്റില്‍ ചെന്ന് വീഴും ...
അണ്ണാ പോപ്പ അടിക്കിന്‍ !! പോപ്പ അടിക്കിന്‍ !!
എടേ എന്തരു ?
അണ്ണാ കാളവണ്ടിക്ക് സൈഡ് കൊടുക്കിന്‍ .. പോം പോം ..
ഹോ .. നിങ്ങളെ സമ്മതിച്ചു കേട്ട .. കാള വണ്ടി നിങ്ങളെ ഓവര്‍ ടെക് ചെയ്തല്ല !!
ഓ ... കൊല കൊല മുന്തിരിക്കാ !!
അണ്ണാ ...
എന്തരു ഡേയ് ?
അണ്ണാ സൈഡിലോട്ടു ചവിട്ടി പിടിക്കീന്‍ .. ബിവറേജ് !! ബിവറേജ് !!
ഓ ബിവറെജാ !! പേടിപ്പിച്ചു കളഞ്ഞല്ല ഡേയ് !!
ഡേയ് കൊച്ചു ..
എന്തരണ്ണാ ?
നീ പോയി ഒരു ഗോല്‍ക്കണ്ട ഫുള്‍ വാങ്ങിയിട്ട് വാ !!
ശെരി അണ്ണാ ... നിങ്ങള് വെയ്ടീന്‍ ... ദാ ... വന്ന് !!
വൈ ദിസ്‌ കൊലവെറി ... കൊലവെറി ഡീ ... അല്ലങ്കിന്‍ വേണ്ട ലവന്മാര്‍ പാണ്ടിയാണെന്നു വിചാരിച്ചു കൂമ്പിനിടിചാലാ !!
അപ്പൊ കെടക്കട്ട് !! പണ്ടിട്റ്റ് അണ്ണന്റെ "രാത്രി ശിവരാത്രി" ..... നീയെന്‍ കാമാക്ഷി...
അണ്ണാ ഒരു ഗോല്‍ക്കണ്ട ഫുള്ള് !!
പൊതിഞ്ഞു പാന്റിന്റെ ഇടയിലോട്ടു കേറ്റി വയ്ക്കാം ... ആഹ !! ആഹ !!
എടേ കൊച്ചു നീ എന്തരിനു കെടന്നു പൊളക്കണ ?
അണ്ണാ അത് !!കുപ്പീരെ മൂട് കൊണ്ട് ... ലവിടെ !! ലെവിടെ ? ലവിടെ !!
ഡേയ് ലതു പൊട്ടിയാലും കുപ്പി പൊട്ടിക്കരുത്‌ കേട്ട ...
അണ്ണാ ദോ പെട്ടിക്കടെരെ അടുത്ത് നിര്‍ത്തിന്‍ !!
ഓ .. നിര്‍ത്തി !!
അണ്ണാ ... കടിക്കാന്‍ വാങ്ങീട്ടു വരാം !!
പെട്ടിക്കടയില്‍ : അണ്ണാ കടിക്കാന്‍ എന്തുണ്ട് ?
കടക്കാരന്‍ : അരിയുണ്ട !!
കൊച്ചു : അണ്ണാ നാലെണ്ണം പൊതിയിന്‍ !!
സീന്‍ രണ്ടു :അരിയുണ്ടയും ഗോല്‍ക്കണ്ട ഫുള്ളുമായി കൊച്ചുണ്ട്രാപ്പിയും കൂട്ടുകാരനും അടച്ചിട്ടിരിക്കുന്ന ഒരു കടയുടെ പുറകില്‍ ഇരുട്ടത്ത്‌ നിന്ന് ഗോല്‍ക്കണ്ട മാറി മാറി പൂശുകയാണ്.ഒരു പെക്ക് കൊച്ചു അടിക്കുമ്പോള്‍ കൂട്ടുകാരന്‍ രണ്ടു ഒരുമിച്ചു അടിക്കും.ടച്ചിംഗ്സിനായ് അരിയുണ്ട കറുമുറാ എന്ന് കടിച്ചു തിന്നും.എന്തോ പെട്ടെന്ന് തൊണ്ടയില്‍ കുരുങ്ങി കൊച്ചുണ്ട്രാപ്പി ഒച്ചത്തില്‍ ചുമക്കാന്‍ തുടങ്ങി ..
ഡേയ് ... എന്തരിനു ചുമക്കണേ ?
തേങ്ങ !!
ഡേയ് എന്തരിനു നീ പള്ളു പറയണേ?
അണ്ണാ പള്ളു പറഞ്ഞതല്ല ... തൊണ്ടയില്‍ അരിയുണ്ടയിലെ "തേങ്ങ കുരുങ്ങയിതാണ്". !!
സീന്‍ മൂന്നു : പാളയത്തെ ഗതാഗത കുരുക്കു .. കൊച്ചുണ്ട്രാപ്പി അടിച്ചു വീലായി സ്കൂട്ടറിന്റെ പുറകില്‍ .. കൂട്ടുകാരന്‍ പാമ്പായി ബൈക്ക് വെട്ടി വെട്ടി നാട് റോഡില്‍ നിര്‍ത്തി ..കൊച്ചുണ്ട്രാപ്പി ബൈക്കില്‍ നിന്നും ചാടിയിറങ്ങി ട്രാഫിക്ക് ഐലന്റില്‍ ചാടി കയറി പോലീസുകാരനെ ഒരൊറ്റ ചവിട്ടു .... ലങ്ങേരു മണ്ടയടിച്ചു ദാ കെടക്കണ് താഴെ!!
പിന്നെ കളിശം പൊക്കി കേറ്റി കൊച്ചുണ്ട്രാപ്പി വണ്ടികള്‍ നിയന്ത്രിക്കാന്‍ തുടങ്ങി ... പിന്നത്തെ കാര്യം പറയണ്ടല്ല അല്ലെ ?
എവിടെന്നോ വന്ന ഒരടി !! ... ചെകിട് പൊളിഞ്ഞു ചെവിക്കകത്ത്‌ ഒരു മുഴക്കം മാത്രം !! ... പിന്നെ കൊച്ചുണ്ട്രാപ്പിയുടെ കണ്ണുകളില്‍ കുറെ നക്ഷത്രങ്ങളും സ്പ്രിങ്ങുകളും !!
കൊച്ചുണ്ട്രാപ്പിക്ക് ബോധം വന്നപ്പോള്‍ താന്‍ മ്യൂസിയം സ്ടഷനില്‍ ആണെന്ന് ബോധ്യമായി.
കൊച്ചുണ്ട്രാപ്പി ചുറ്റും ഒന്ന് നോക്കി ... കുറെ ചെരുപ്പക്കാരന്മാര്‍ ജട്ടി മാത്രം ഇട്ടു കൊണ്ട് നില്‍ക്കുന്നു .. അതില്‍ പല ജട്ടികളും തന്നെ നോക്കി പല്ലിളിക്കുന്ന പോലെ കൊച്ചുണ്ട്രാപ്പിക്ക് തോന്നി .. അതില്‍ പലതും ഓട്ട വിഴുന്നതും എലാസ്ടിക്ക് പോയതും ഒക്കെ ആയിരുന്നു !!
പെട്ടെന്നൊരു ആക്രോശം മുണ്ടും ഷര്‍ട്ടും ഊരടെ!! എസ് ഐ ആണ് ...
കൊച്ചുണ്ട്രാപ്പി മടിച്ചു മടിച്ചു മുണ്ടും ഷര്‍ട്ടും ഊരി .. കൊച്ചുണ്ട്രാപ്പി പച്ച വരകളുള്ള കളിശം മാത്രം ധരിച്ചു കൊണ്ട് നാണിച്ചു കൊണ്ട് നഖം പോയ പേര് വിരല്‍ കൊണ്ട് ചിത്രം വരച്ചു നിന്നു.
ഹൌ സെക്സീ ഡ !!
എന്തോ ശബ്ദം കേട്ട് കൊച്ചുണ്ട്രാപ്പി സൈഡിലോട്ടു നോക്കി... അയ്യോ അണ്ണനെ കുനിച്ചു നിര്‍ത്തി ലങ്ങേരെ മുതുകില്‍ ബിയര്‍ കുപ്പികള്‍ നിരത്തി വച്ച് പോലീസുകാര്‍ കാത്തു നില്‍ക്കുന്നു .. ബാറില്‍ മേശപ്പുറത്തു കുപ്പികള്‍ നിരത്തി വച്ചിരിക്കുന്ന പോലെ.അവര്‍ ഇടയ്ക്കിടയ്ക്ക് വാച്ചും നോക്കുന്നുണ്ട് ..
എവിടെയോ ഒരു വെടി പൊട്ടി ... പോലീസുകാര്‍ ആര്‍ത്തു വിളിച്ചു ... "ഹാപ്പി ന്യൂ ഇയര്‍ 2012" .... ബീയര്‍ കുപ്പികളുടെ വായില്‍ നിന്നും നുരഞ്ഞു പൊന്തിയ ദ്രാവകം കൊച്ചുണ്ട്രാപ്പിയെയും കടന്നു പോലീസ് സ്ടെഷനെയും കടന്നു "താനേ" ചുഴലിക്കാറ്റില്‍ താനെ പറന്നു പോയി.
No comments:
Post a Comment