തമ്പുരാന്റെ നീതി പീഠത്തില് അയാള് കൂപ്പു കൈകളോടെ വിനീതനായി നിന്നു ...
ഭൂമിയില് നീ ഒത്തിരി യാതനകള് അനുഭവിച്ചു അല്ലെ ? ദൈവം
അതെ സര്വേശ്വരാ !! .. അയാള് വിനീതനായി പറഞ്ഞു ...
നിനക്ക് പട്ടിണിയും പരിവട്ടവും ആയിരുന്നു അല്ലെ ?
ഈ പട്ടിണിയും,യാതനകള്ക്കും മുന്പ് നീ ഒരുപാട് ധനവാന് ആയിരുന്നല്ലോ ?
എന്തെ എല്ലാം നഷ്ടപ്പെട്ടു ?
തമ്പുരാനെ അതിനു കാരണം എന്റെ അമിതമായ ലൈന്കീക ആസക്തിയും,ചൂത് കളിയും,മദ്യപാനവും ആയിരുന്നു !!....
എന്റെ ദുര് നടപ്പ് കാരാണം എനിക്ക് എല്ലാം നഷ്ടമായി ...
എന്റെ കുട്ടികളും ഭാര്യയും എന്നോടൊപ്പം തെണ്ടാനിറങ്ങി .....
ജീവിത സത്യങ്ങള് മനസിലാക്കി വന്നപ്പോഴേക്കും അങ്ങ് എന്നെ തിരിച്ചു വിളിച്ചു ! .... ഭാര്യയും കുട്ടികളും അനാഥരായി ! ....
ഹും ! .... ചിത്ര ഗുപ്താ .... ഇവന്റെ കണക്കു പുസ്തകം തുറക്കൂ .... ദൈവം ആജ്ഞാപിച്ചു !!
ചിത്ര ഗുപ്തന് അയാളുടെ കണക്കു പുസ്തകം തുറന്നു ....
ചിത്ര ഗുപ്തന്റെ നെറ്റി ചുളിഞ്ഞു !!!!
എന്തായി ചിത്ര ഗുപ്താ ? .... ദൈവം അക്ഷമനായി ചോദിച്ചു ...
ഭഗവാനെ ഇയാള് ഭൂമിയില് ചെയ്ത നന്മകള് തുലോം കുറവാണ് ! ... തിന്മകള് കൂടുതലും !!!
ഹും ... ദൈവം ഒന്ന് കൂടി ആലോചിച്ചു .... എന്നിട്ട് അയാളോട് പറഞ്ഞു ...
നിനക്ക് സ്വര്ഗം നിഷിദ്ധമാണ് !... നരകത്തിലേക്ക് പോകേണ്ടി വരും !.....
അങ്ങയുടെ കല്പ്പനകള് ഞങ്ങള് മനുഷ്യര്ക്ക് നിഷേധിക്കാന് കഴിയില്ലല്ലോ !! ... എല്ലാം അങ്ങയുടെ ഇഷ്ടം പോലെ ....അയാള് വിനീതനായി മൊഴിഞ്ഞു ....
ചിത്രഗുപ്താ !...
എന്തോ തിരു മനസ്സേ ! .... ചിത്രഗുപ്തന് ഓടിയെത്തി ...
കിങ്കരന്മാരെ വിളിക്കൂ ... ഇവനെ കറുത്ത വസ്ത്രം ധരിപ്പിച്ചു നരകത്തിലേക്ക് കൂട്ടി കൊണ്ട് പോകൂ .... ദൈവം കല്പ്പിച്ചു !!
അടിയന് ! .... ഉത്തരവ് !....
ചിത്രഗുപ്തന് കൈ കൊട്ടിയതും കിങ്കരന്മാര് പ്രത്യക്ഷപ്പെട്ടു ...
അവര് ആ മനുഷ്യനെ കറുത്ത വസ്ത്രം ധരിപ്പിച്ചു നരകത്തിലേക്ക് കൂട്ടി കൊണ്ട് പോയി ...
ദൈവവും ചിത്ര ഗുപ്തനും പുറകെ അവര്ക്കൊപ്പം ഉണ്ടായിരുന്നു ...
സാധാരണ ഭൂമിയില് ദൈവം എല്ലാര്ക്കും മുന്പേ നടന്നു വഴി കാണിക്കുമായിരുന്നു ... ഇവിടെ നരക യാത്രയില് അങ്ങ് പുറകെ നടന്നു അയാളെ ഓര്ത്തു പരിതപിക്കുന്നുണ്ടായിരുന്നു ....
നരകത്തില് എത്തിയതും അയാള് അത്ഭുതത്തോടെ ചുറ്റും നോക്കി !!..
എല്ലായിടത്തും താന് ഭൂമിയില് കണ്ടിട്ടില്ലാത്ത നികൃഷ്ട ജീവികള് !! ...
രൂക്ഷമായ ഗന്ധം !!....
അവിടെയവിടെയായി അഗ്നി ആളി കത്തുന്നു !! ...
കുറെ ആത്മാക്കള് അതില് വെന്തുരുകുന്നു !....
അവരുടെ രോദനങ്ങള് കേള്ക്കാമായിരുന്നു !! ...
അവര് ദൈവത്തെ കണ്ടതും ആര്ത്തു വിളിക്കുവാന് തുടങ്ങി .... മഹാ പ്രഭോ ഞങ്ങളെ ഈ നരകാഗ്നിയില് നിന്നും രക്ഷിക്കൂ !!...ഞങ്ങളെ ശിക്ഷിച്ചത് മതിയായില്ലേ ദയാ നിധെ ?
ദൈവം ആ രോദനങ്ങള് ഒന്നും ചെവിക്കൊള്ളാതെ തിരിഞ്ഞു നിന്നു അവരുടെ ദുരിതതെയോര്ത്തു പരിതപിച്ചു ....
ഭൂമിയില് നിങ്ങള് ചെയ്ത പാപങ്ങളുടെ ഭലമാണ് നിങ്ങള് അനുഭവിക്കുന്നത് ....ദൈവ നിയമങ്ങള് പാലിക്കപ്പെടണം ... അല്ലായെങ്കില് പ്രപഞ്ച നിയമങ്ങള് വൃഥാവിലാകും !!!
ഇതെല്ലാം കണ്ടു കൊണ്ട് അയാള് ഒരു ചെറു പുഞ്ചിരിയോടെ നിന്നു ...
അത് കണ്ടു ദൈവം അത്ഭുതപ്പെട്ടു !! ...
കുറച്ചു സമയത്തിനുള്ളില് നരകാഗ്നിയില് വെന്തുരുകേണ്ട നീ എന്തിനാണ് ചിരിക്കുന്നത് ? ദൈവം അയാളോട് ചോദിച്ചു ....
ഇല്ല ഭഗവാനെ ഇതിനേക്കാള് വല്യ നരകാഗ്നി ഞാന് ഭൂമിയില് അനുഭവിച്ചതല്ലേ ...അതില് കൂടുതല് എനിക്ക് എന്ത് ശിക്ഷയാണ് വിധിക്കാന് പോകുന്നത് എന്നോര്ത്ത് ചിരിച്ചതാ ...
ദൈവം ആകെ ആശയ കുഴപ്പത്തിലായി ... നീയെന്താ പറഞ്ഞു വരുന്നത് ?
അതെ .. അങ്ങ് എന്നെ ഭൂമിയിലേക്ക് തന്നെ തിരിച്ചയക്കൂ !! ...
ഇതില് വല്യ നരകം അതാണ് ....അവിടെ ഞാന് ഇതിലും വല്യ ശിക്ഷ അനുഭവിച്ചവനാണ് ....
ഇനി ഒരു പ്രേതമായി ഞാന് അവിടെ അലഞ്ഞു തിരിഞ്ഞു നടന്നോളാം അതില് പരം ശിക്ഷ അങ്ങക്ക് നരകത്തില് നടത്താന് കഴിയില്ലാ ....
അങ്ങനെയാണോ ? അപ്പൊ നിനക്ക് ഭൂമിയിലേക്ക് തന്നെ പോകണം അല്ലെ ?
അതെ പ്രഭോ അങ്ങെന്നെ ആ വല്യ നരകത്തിലേക്ക് തിരിച്ചു അയച്ചാലും ...
ചിത്രഗുപ്താ ...
അടിയന് !!
ഇയാളെ വെള്ള വസ്ത്രങ്ങള് ധരിപ്പിച്ചു ഭൂമിയിലേക്ക് തിരിച്ചയക്കൂ ... അയാള് പറയുന്നതിലും കാര്യമുണ്ട് ... ഈ നരകത്തേക്കാള് വല്യ നരകം ഭൂമി തന്നെ !!
No comments:
Post a Comment